Old News
लम्की, १३ मंसिर । कैलाली जिल्लाका बाढी पिडित, मुक्त कमैया तथा सुकुम्बासीहरुले बलिया गा.वि.सको वडा नं. ८ र ९ मा पर्ने डुडेझारी जंगल कब्जा गरेर घर टहरा निर्माण गरेका छन् ।
अखिल नेपाल सुकुम्बासी संघको केन्द्रिय योजना अनुसार उनीहरुले उक्त जंगल कब्जा गरी घर टहरा निर्माण गरेका हुन ।उक्त स्थानमा कैलाली जिल्लाका ६ वटै निर्वाचन क्षेत्रका साथै सुर्खेत र बर्दिया जिल्लामा बाढी पिडित सुकुम्बासी र मुक्त कमैयाहरुले घर टहरा निर्माण गरेका छन् ।
करिब २ सय बिगाहा जग्गा कब्जा गरेर मंसिर १० गतेबाट बसोबास गर्न आएका सुकुम्बासीहरुले हालसम्म करिब ४ हजार भन्दा बढी घर परिवारले टहरा निर्माण गरेर बसोबासका लागी आइसकेको र डुडेझारी क्षेत्रमा १० हजार घरपरिवारलाई बसाउने योजना रहेको अखिल नेपाल सुकुम्बासी संघ कैलालीका अध्यक्ष नरेश शाही "रक्तिम" ले बताए ।
संघको केन्द्रिय समितिको तथ्याङ्कक अनुसार कैलालीमा मात्र ३८ हजार सुकुम्बासी रहेका समेत शाहीले बताए । भूमिहिन, अव्यवस्थित र बाढीपिडितहरु सबै सुकुम्बासी भएको उनले बताए ।
बल प्रयोग गरेर सुकुम्बासीहरुलाई उठाउन खोजे प्रतिकार गरिने पूर्ण प्रसाद बजगाईले बताए । आफुहरुले वन विनाश नगरेर वन भित्रको डुडेझारीको खाली फाटमा मात्र बसोबास गरेको सुकुम्बासीहरुले बताएका छन ।
